Latest News

Stay up to date with the latest in Educational news

STA i annan plan reouver lekol tourizm lo Praslin

Minister pour Tourizm, Laviasyon Sivil, Por ek Marin in dir ki Lakademi Tourizm Sesel (STA) i annan plan reouver son lekol lo Praslin de ki i ganny en landrwa apropriye.

Se Minis pour Tourizm, Laviasyon Sivil, Por ek Marin Msye Maurice Loustau-Lalanne ki’n donn sa langazman dan sesyon Lasanble Nasyonal yer apre ki manm elekte pour distrik Baie Ste Anne Msye Churchill Gill ti’n dan en kestyon dirzans demann li pour eksplike akoz ki sa training ki bann etidyan Praslin ek La Digue ti pe swiv anba sa progranm laprantisaz in ganny diskontinyen, vi ki sa progranm ti pe mars tre byen, e sa ti en langazman ki ti’n fer avek bann paran Praslin ek La Digue.

Minis Loustau-Lalanne ti dir ki laprantisaz lo Praslin ti ganny ofer depi 2003 ziska 2007 an partenarya avek Seychelles Community Training Institute (SECTI), Minister Lanplwa ek Zafer Sosyal a sa letan ek lakonpannyen prive Coco-de-Mer Enterprise.

I ti eksplike ki se lakonpannyen Coco-de-Mer Enterprise ki annan lotel Coco-de-Mer ek lotel Black Parrot ki ti donn permisyon Msye Flavien Joubert, ki sa letan ti en konsiltan pour sa lantrepriz e osi en General Manager pour enn sa lotel, permisyon pour servi son lakaz konman sant formasyon. Sa lantrepriz ti osi permet 2 son bann manager seselwa – en executive chef Dick Ernesta ek en duty manager Josepha Payet – pour ansennyen lo sa kour formasyon. Madanm Bernadette Matthieu, asistan manager « Marechiaro »  ti osi donn formasyon.

«Nou ti konmans avek en 20enn etidyan pour 4 kour me letan lakantite etidyan ti ogmante pour vin 40, la nou ti servi sant kominoter Grand Anse. Malerezman sa sant pa ti konvenab akoz ti annan bokou tapaz. Madanm Mitcy Larue, letan i ti vin MNA, ti donn son lasal miting dan son lofis pour servi konman laklas. Nou ti annan sipor bann lotel ki ti anvoy enpe zot bann staff management pour ed nou. Par egzanp, Onorab Churchill Gill ti anvoy son HR manager, Madanm Cindy Cedras, pour donn en koudmen. Msye Dereck Barbé ki sa letan ti Praslin ti osi ede. Nou ti ganny bann lezot sipor avek lotel L’Archipel, Lemuria, Paradise Sun, Britannia, Coco-de-Mer Enterprise, La Réserve, Village du Pêcheur, ensideswit,» Minis Loustau-Lalanne ti dir.

I ti azoute ki «sa kour laprantisaz sa letan ti pour zis 1-an e ti spesifik pour sa travay ki sa bann etidyan ti anvi fer. Vedir ki si en etidyan ti anvi en karyer dan restoran ek bar, i ti konsantre zis lo laspe sa domenn. Dan en group 40, nou ti alafen sorti avek 32 etidyan ki ti reisi.»

Se an 2008 ki STA ti pran progranm an antye e la i ti fer progranm vin 2-an olye 1-an e osi azout bann size parey franse, angle e matematik pour sa kour vin an norm avek kriter ki lotorite i demande.

«Letan STA ti pran kontrol, nou ti bezwen al rod en lot landrwa pour fer kour, nou ti ganny en lasal lekol avek lekol Baie Ste Anne. Nou ti pe lwe lakwizin School Meal. Nou’n osi bezwen lwe Baha’i Centre e pour bann kour ICT nou ti fer li Grand Anse. STA ti anvoy en kordinatris e ansennyan aplentan lo Praslin. Zot ti ganny sipor plizyer dimoun part time e ansennyan sorti Mahé. Nou ti pran nou 12 etidyan par laklas me nou ti vwar ki avek tou sa bann defi lenfrastriktir, ti annan bokou zot ki ti kite. Malerezman, sa proze pa’n materyalize e la STA ti vwar li kwense avek sa sitiasyon kot napa landrwa pour fer kour, etidyan pe kite, e STA pe kontinyen depanse e ti nepli fezab lo nivo kou ek laprantisaz. An 2016, STA ti met sa sitiasyon devan Minis Tourizm kot en desizyon ti ganny pran pour fer bann etidyan desann Mahé parey tou lezot etidyan bann sant profesyonnel ziska ler gouvernman, ansanm avek sekter prive, ava fer en lekol otelyer konvenab lo Praslin,» Minis Loustau-Lalanne ti eksplike.

En premye delegasyon avek reprezantan Minister Ledikasyon, reprezantan Youth Hostel ek STA ti zwenn bann paran pour fer zot konnen. Apre, en dezyenm delegasyon sorti zis kot STA ti al adres bann paran.

Minis in dir ki aktyelman i annan 15 etidyan dezyenm lannen ki sipoze fini lekol an Zen e zot pe reste lo Praslin e STA i anvoy profeser ansenny zot tou le Sanmdi dan en pti laklas ki i pe servi kot lekol Baie Ste Anne. Par kont dan sa menm group dezyenm lannen i annan 3 ki pe fer Wellness and Spa e zot in desann Mahe ziska letan zot graduate an Zen sa lannen akoz napa fasilite lo Praslin pour zot. STA fek aksepte ankor 18 etidyan Praslin pour sa lannen.

An se ki konsern si vre STA ti pou ganny en kare later pour konstriksyon en lekol pour kontinyasyon letid dan en fason permanan, Minis Loustau-Lalanne in dir ki STA pa’n ganny okenn later pour fer lekol, me «par kont, nou an diskisyon avek Minister Kiltir pour vwar ki mannyer nou pou ansanm realiz en proze lekol dan zot proze pour bann artis lo zil Eve.»

Vi ki bann etidyan Praslin i bezwen vin Mahé pour vin fer zot letid, Onorab Gill ti osi demann Minis Loustau-Lalanne ki pou arive avek sa bann depans ekstra ki paran pou bezwen fer e si  son minister i dan pozisyon pour negosye avek Departman Sosyal akoz sa bann paran i vwar li difisil pour fer sa bann depans ekstra.

Minis Loustau-Lalanne ti reponn an dizan ki etidyan Praslin ek La Digue ki pe ganny 1400 roupi konman zot allowance, i ganny zot 800 roupi ekstra.

«Ladan 200 roupi i ganny tire pour pey hostel. Apre, zot ganny zot en return ticket tou le mwan. Me selman, etidyan ek paran in konplent ki sa larzan pa ase dapre kou lavi. Nou ti a kontan profit sa lokazyon pour demann Lazans Proteksyon Sosyal pour fer mye pour donn plis lasistans,» Minis Loustau-Lalanne ti dir.

Minis in osi azoute ki apre ki etidyan ek paran ti’n fer sorti serten konsern son minister in verifye avek managerhostel e in konfirmen ki zot pe fer enpe sanzman dan bann enfrastiktir ek fasilite kot hostel. 

«Manager hostel in fer resorti ki zot ti eksplik sa bann zanfan okonmansman ki pou annan sa bann amelyorasyon kot hostel pandan 2017. Pour sa lannen en provizyon 4.5 milyon roupi in ganny fer pour finans bann travay renovasyon mazer lo sa sis blok kot hostel. Bann travay renovasyon i konpri twatir, miray anndan ek miray deor, bann laport, lafnet, travay plonbaz ek elektrik, met tiles, fire and safety installation and security house, rekonstriksyon lavwar ek en langar pour fer sek lenz, lenstalasyon kamera CCTV ki kouver premis Youth Hostel antye, e nouvo lili,» minis ti azoute.

I ti osi dir ki tender ti ouver pour tou bann kontrakter ki’n anrezistre avek en laysenns klas 1. Ti annan en miting mandatwar pour tou bann kontrakter Lendi le 6 Mars lo site Youth Hostel, e tou bann prosedir procurement in ganny obzerve. 

«Sa kontrakter ki reisi ganny sa kontra pou annan en peryod 18 semenn pour fer sa travay e sa i konmans depi ler i siny son kontra ek notis pour konmanse,» Minis Loustau-Lalanne ti dir avan azoute ki serten travay in deza konmanse lo Youth Hostel tel ki travay lo bann cabinet, karpet ki’n preski fini enstale, renovasyon lo bann twalet (49 seat covers in fini ganny sanze) main hole in fini ganny fer, bann robinen in sanze pour minimiz gaspiyaz delo, lenstalasyon lalimyer sekirite ek lenstalasyon televizyon dan bann younit.

[Source : Seychelles Nation]

About Us

TEC is responsible for tertiary education and to co-ordinate the sustainable and harmonized development of tertiary education nationally.

 Tertiary Education Commission Seychelles

Contact us

TERTIARY EDUCATION COMMISSION (TEC)

Ministry of Education Headquarters
Mont Fleuri, Mahe, Seychelles
P.O.Box 418, Victoria


Tel. 4610 944 | Fax. 4610 923 
Email: ceosec[at]tec.edu.sc 

Search